المتحدث باسم الرئاسة- فيسبوك
تكريم فريق الجامعة الالمانية بالقاهرة القائم على عمل تصميم الهوية البصرية لمدينة أسوان.

نص تعليق السيسي على مشروع الهوية البصرية المقدمة من شباب الجامعة الألمانية 28/12/2021

منشور الأربعاء 29 ديسمبر 2021

 

 السيسي: (مبتسمًا) بكام؟ بكام؟ بكام؟ مش لازم لما تكملوا تعملوا شغلكوا تكملوه بقى؟ مش في عندكوا كلية هندسة في الجامعة؟ طيب مايقولونا الموضوع ده لما نيجي نعمله، يحطوا كل حاجة كدا، وعندكوا ناس بتعمل في اقتصاد وكدا، نقول النهارده اللي بنطرحه عليك ده هايتكلف كذا.

ما اقصدش كدا عشان ده عائق إن إحنا نعمله، لا، إنتوا هاتشوفوا إن وإحنا قاعدين دلوقتي هانعمله (تصفيق) بس أنا كنت بتكلم (يضحك الرئيس) صحيح، إحنا هانعمله، بأمر الله سبحانه وتعالى.

بس أنا كنت أتمنى إن إنتم كمان تقولولنا لو إحنا حبينا نعمل ده، على المنشآت اللي إنتوا ذكرتوها، سواء كانت مباني حكومية، أو المناطق الخدمات العامة زي محطة السكة الحديد أو المطار أو غيره، أو الأوتوبيسات أو ده أو ده، لما إنتي النهارده تقولي إيه، طب أنا عندي ليك خيار، أديك أول خيار، خلي المدينة دي مدينة خضرا، والمدن والأوتوبيسات اللي هاتمشي بيها بالكهربا أو بالغاز، ودي تكلفتها كذا. والتاكسيات اللي موجودة ديت ممكن نخليها بردو بالكهربا أو الغاز، ودي تكلفتها كذا.

أنا ما أقصدش بده.. العمل رائع وجميل، وإنتم حاجة.. مش إنتم، إنتم شباب جميل، وشابات جميلات (تصفيق) واللي عملتوه حاجة تفرحنا وتسعدنا. وأنا عايز أقول من خلالكم، عرفتوا إن إحنا ممكن نخلي الدولة كلها تعمل للدولة كلها؟ مش الجامعة الألمانية عملت؟ طب في كام جامعة تاني؟ يعملوا حاجات تانية كتير، مش كدا؟ بكام بقى؟ (يضحك الرئيس) أنا بشكركوا، متشكر جدا، شكرا.

...

 

39:24

الحضور: (تصفيق وتحيات عالية) بنحبك.. يا ريس.. بنحبك.. يا ريس..

السيسي: وأنا والله.. وأنا والله.. أقولكوا بس.. وأنا والله بحب كل المصريين. (تصفيق) ومش عايز بس.. عايز أقولكوا إن إحنا الأسبوع ده كان أسبوع جميل قوي. واللي شوفناه بيقول إن إحنا هدنا خطوة كويسة من ألف خطوة. خدنا خطوة من ألف خطوة في الصعيد.

فإن شاء الله، أنا ممكن أعاهدكم أنا والحكومة وكل اللي موجودين إن إحنا نفضل نشتغل، ونشتغل، ونشتغل، لغاية لما نغير الواقع اللي إحنا فيه. (تصفيق)

استنوا بس.. الهوية البصرية اللي اتقالت ديت إحنا قلنا إن أسوان العيد بتاعها يوم 15؟ 15 يناير؟ مش كدا؟ مش عارف هل المعاد بعيد قوي إن إحنا نقدر نعمل حاجة كمثال؟ هدية.. هدية وزارة الدفاع، ووزارة الداخلية ووزارة الإسكان.. هدية وزارة الدفاع ووزارة الداخلية ووزارة الإسكان، دول اللي معاهم إيه؟ معاهم الفلوس (يضحك الرئيس). يخلصولي الموضوع لو قدرنا قبل يوم 15 هانبقى كلنا فرحانين. (تصفيق) شكرًا جزيلًا.

يعني.. يعني ال.. ال.. العربيات اللي عايزة تتغير والأوتوبيسات، تتغير ويتحط عليها اللوجو اللي هم الجامعة الألمانية حطته. المباني بتاعة ال.. محطة السكة الحديد والمطار ومنشآت أخرى، معرفش إيه تاني.. إذا كان في حاجة بتتعمل على الممشى، منشآت أو كلام من هذا القبيل. طب الموضوع هايتكلفله 100 مليون، ماليش دعوة.. طب 200 مليون، ماليش دعوة.. طب 500 مليون، ماليش دعوة يا دكتور مصطفى... (تصفيق) شكرا وكل سنة وإنتوا طيبين.

...

ألقيت الكلمة في محافظة أسوان، حيث شهد الرئيس احتفالية فنية على المسرح الروماني، ختاما ل"أسبوع الصعيد" بعد افتتاح مدينة أسوان الجديدة، وذلك بحضور الدكتور مصطفى مدبولي، رئيس مجلس الوزراء، وعدد من الوزراء، وعدد من أهالي أسوان، وطلاب الجامعة الألمانية.

...

خدمة الخطابات الكاملة للسيسي تجدونها في هذا الرابط